目錄 登入會員 購物車 {{currentCart.getItemCount()}}

圖片:@osayosan34(Instagram)

- 收納有法 -

 

香港地屋仔細細,唔少港人屋企都俾雜物佔據咗唔少空間,而且甚少有整理收納嘅習慣,通常係到睇唔過眼先會執屋,但大部分都係搵地方塞好就算,「眼不見為淨」,時間耐咗就唔記得放咗去邊或者已經唔記得物件嘅存在,然後又再買返同一樣物品。如果你或你嘅屋企人/朋友都有以上習慣,咁就多加注意吓啦!善用正確收納唔單止可以為生活騰出更多空間,更重要嘅係反思生活同消費模式。以下就同大家分享一啲收納方法。

收納始於減物

正確收納第一步就係要減少物品,否則再多嘅空間都會被堆滿。要騰出空間就要先捨棄唔再需要嘅物品。大家可以先分類同篩選,捨棄唔再需要嘅物品,為每種物件訂下數額,最後收納、標籤、擺放。

 

如果係篩選過程中,發現有無穿無爛嘅物品,可以轉贈俾有需要嘅人士或放上網拍賣,既可以清空自己嘅雜物,幫到人之餘仲可以延續物品嘅生命,減少浪費,為環保出一分力,一舉多得。

 

圖片:@getredressed (Instagram)

衣物收納

講到屋企物件,衣物應該佔咗一個好大嘅空間,所以係時候要檢示你啲衫褲鞋襪啦!將衣櫃嘅衫通通拎出嚟,揀出已經唔著嘅衣物,用袋裝好,轉贈出去。剩低嘅衫就先分季節,再細分類成上衣、裙、褲等,統一擺放,搵起衫上嚟都快手啲啦。過季衫可以放喺衣櫃較高或較入嘅位置,到換季時將現季同過季對掉就可以。而冬天厚被可以用真空袋收納,咁就可以節省空間。

大多數人都係以平放方式,一件一件疊起衣物。相反如果將衣物摺好後打豎排列存放,就可以一眼睇晒衣物款式同顏色,方便同快速素揀到適合嘅衣物之餘,亦都可以避免因平放而被頂層衣服遮蓋,遺忘底層衣物。同時大家亦可以為衣物數量設上限,控制數量,否則只會事倍功半。

 

圖片: @simplyzero_ (Instagram)

圖片:@mariekondo (Instagram)

圖片: @themasterbedroom (Instagram)

收納次序、擺放

收納箱固然係收納嘅好幫手,但記得要完成物品分類同篩選,確定咗所需收納用品嘅數量同大小後先好購買。

大家可以根據物件嘅使用頻率而決定擺放物件嘅位置:最常使用放胸口位置,方便就手;較常使用就放底部,而唔常用就放頭頂位置。另外亦建議將同類物件放埋一齊,而且用完物品,應該即刻將佢哋歸位。

圖片: @penta_room (Instagram)

常用收納用品

市面上有唔同材質嘅收納箱,如紙箱、竹藍、PP膠盒等,各有特色。當中以PP膠盒用途最為廣泛,方便收納唔同嘅物件,如衣物、被、玩具、文具、文件等。大家可以根據個人需要選擇不同款式,放喺衣櫃內/頂、床/沙發底、廚房雪櫃,令空間更為整齊企理,方便尋找所需物件。亦有啲貯物箱附有手抽或滖輪,方便提取移動。

另外,大家亦可以選擇透明設計嘅收納箱,可以一目了然睇到箱內物品。如果想保持私隱度,亦可揀半透明設計。同時建議大家喺收納箱貼上標籤,方便尋找物品,亦可培養放回原位嘅習慣。

圖片:@saya.s.a (Instagram)

Less is More

講到尾,真正嘅收納唔係話買一堆收納產品,然後塞晒啲物件入去。所謂收納係包裝整理,重新審視生活同購物模式,了解已擁有物品嘅數量,減購非必需品,減少浪費,咁先可以為生活帶來便利和舒適。記住人先係屋企嘅主角,而非物件,係時候騰出空間同屋企人好好互動相處!

圖片:@osayosan34 (Instagram)

-推薦產品-

偏身貯物箱適用於床/沙發底或櫃頂,用盡香港蝸居空間。

附有滖輪嘅中大型防潮收納箱適合放重物,提取移動。亦可收納冬天厚被。

附有手抽小型收納箱方便提取物件。適合放小朋友玩具或文具。

透明連蓋整理箱適合收納零食、書籍、文件等。